2 Timothy 2
Tangada dauwa manawa dahi a Jesus Christ
1Gei adu gi di goe, go dagu dama daane, hagamahi i lodo tumaalia dela gu hai mee ngaadahi ginai gidaadou i tadau buni ang gi Jesus Christ. 2Kae ina nia helekai ala ne hagalongo ginai goe, ala nogo hagadele ko au i mua digau haga modongoohia dogologo, wanga ina gi nia daangada ala e hagadagadagagee ginai goe, ala e mee di agoago digau ala i golo.3Kae ina doo duhongo hagaduadua, be di hai o tangada dauwa humalia ni Jesus Christ. 4Tangada dauwa le e hiihai e haga tentene dono dagi dauwa, ge hagalee e unihagi ana hegau gi nia hegau digau ala hagalee digau dauwa. 5Tangada dela ma ga lele i di hoiaa, la hagalee kae di hui o di aali maa ia ma ga hagalee daudali nnaganoho o di hoiaa. 6Tangada hai hadagee dela koia e ngalua damana, le e kae dono duhongo matagidagi i di madagoaa e hadi ai nia hua o di hadagee. 7Goe hagabaubau ina agu mee ala e helekai ai, idimaa, Dimaadua ga hagamaamaa goe, gi donu gi nia mee aanei huogodoo.
8Gi langahia egoe Jesus Christ dela ne mouli aga mai i di made, mee tangada mai di madawaawa o David, gadoo be di haga modongoohia i lodo di Longo Humalia dela e hagadele ko au. 9Au e dadaaligi i dogu hagadeledele di Longo Humalia deenei, gei au e lawalawa gi taula baalanga be tangada gu hai dana mee huaidu, e galabudi. Gei nia helekai a God le e deemee di lawalawa. 10Deenei laa au e hagamahi adu hua beelaa i nia mee aanei huogodoo, i di gili nia daangada a God ne hilihili aga, bolo gi kae nadau haga mouli i di mouli dee odi mai Jesus Christ mo di madamada dee odi. 11Telekai e donu deenei boloo,
“Gidaadou ma ga mmade madalia a Christ, gei gidaadou e mouli aga labelaa madalia a mee.
12Maa gidaadou ga hagamahi adu hua beelaa, gei gidaadou ga dagi madalia a mee. Gei gidaadou ma ga haga de iloo a mee, gei mee ga haga de iloo ia labelaa gidaadou. a 13Maa gidaadou ga hagalee manawa dahi gi mee, gei mee e manawa dahi hua mai gi gidaadou waigolo, i mee e deemee di hai hala i ana helekai.”
Tangada hai hegau donu
14Haga langahia ina nia mee aanei gi au daangada. Hagi anga ina gi maaloo gi digaula i mua o God bolo gi hudee lagamaaloo i nadau mehanga i di hai o nia bida helekai, idimaa, nia lagamaaloo la deai ono humalia ai, e hagahuaidu hua digau ala e hagalongo. 15Heia au hegau gi humalia i mua o God, gi hai be tangada ngalua, e ngalua hagalee langaadia, dela e agoago nia daangada nia helekai donu a God. 16Haga paa gi daha mo nia balu kai ala e hai baahi gi God, ala hogi e haga mogowaa nia daangada mo God. 17Nia agoago aalaa, le e hai gadoo be di magibala dela e gai nia goneiga. Nia agoago aanei le e hai go nia daane dogolua go Hymenaeus mo Philetus. 18Meemaa gu hudu gi daha di ala dela e donu, gei gu haga hala nia hagadonu digau ala gu hagadonu, i nau helekai bolo di haga mouli aga o digau mmade la gu lawa di hai. 19Di hagamau dela ne haga noho go God, la e deemee di ngalungalua, gei gu hihi i hongo di maa boloo, “God e iloo ia ana dama” ge gu hihi labelaa boloo, “Maa iai tangada e hai bolo ia tama ni Dimaadua, geia gi diagia nia mee huaidu.” b20I lodo di hale damana iai nia hagadilinga pileedi miami i nolodo: hunu maa ne hai gi nia silber mono goolo, hunu maa ne hai gi nia laagau mono gelegele. Hunu maa e hai hegau anga hua i nia madagoaa hagalabagau, gei hunu maa e hai hegau i di waalooloo. 21Tangada dela ma ga haga madammaa ia gi daha mo nia huaidu huogodoo, geia ga hai hegau i nia mee ala koia e hagalabagau, idimaa, mee gu dugu ia gi nia hegau o dono Dagi, ge gu togomaalia ang gi nia hegau humalia huogodoo. 22Hudee heia goe gi hiihai gi nia hiihai o nia mouli o nia dama daane mo dama ahina. Haga mahi heia goe gi donu, mo di hagadonu, mo di aloho, mo di noho tentene, goodou mo digau ala e manawa madammaa, ala e gahigahi a Dimaadua i di hagamaamaa. 23Hagapaa gi daha mo nia daangada ala e lagamaaloo boiboi ge hagalee donu nadau mehanga, idimaa, goe e iloo hua bolo digaula e hagaodi gi di hagadau heebagi. 24Tama hai hegau a Tagi gi hudee lagamaaloo. Mee e dumaalia gi digau huogodoo, tangada agoago humalia ge hila gi lala. 25Mee e daudonu dana agoago digau ala e hai baahi gi ana agoago, gei God ga dugu anga di madagoaa e huli ai digaula gi daha mo di huaidu, gei ga iloo ginaadou di tonu. 26Gei digaula ga donu ang gi ginaadou, ga llele gi daha mo di hele a Satan dela ne kumi digaula bolo gi hagalongo gi deia.
Copyright information for
KPG